La nassite dal Stât patriarcjâl furlan

Al jere il 3 di Avrîl 1077 cuant che a Pavie l'imperadôr Indrì IV al sancive la nassite dal Stât patriarcjâl furlan, come premi ae lealtât dal Patriarcje di Aquilee Siart. "Si costituive - al spieghe il storic Giancarlo Menis te sô "Storie dal Friûl" - un vast e compat teritori che al veve di sotstâ ae uniche jurisdizion feudâl dal Patriarcje, rinfuarcint, cussì, une realtât sociâl za consolidade mediant di un lunc procès storic e che, di li indevant, par trê secui e mieç, e varês metût dongje i furlans in formis simpri plui elevadis di vite civîl".

Tai agns a vignî si sarès zontât al Patriarcje il Parlament de Patrie, un dai prins in Europe, dulà che si sentavin no dome i predis e i nobii, ma ancje i rapresentants dai Comuns. Za tal XIV secul il Parlament al controlave il stes Patriarcje.

Il Stât patriarcjâl al veve ancje une sô bandiere: la innomenade acuile di aur, cun bec viert e sgrifis rossis, suntun cjamp celest. L'esemplâr plui antîc - dal 1350 - al è in mostre tal Domo di Udin. E je une des bandieris plui vecjis d'Europe. (wi.ci)