→ SALE N. 1

24 DI MAI DAL 1946: IL FRIÛL AL À LA SÔ VÔS

1946

La idee di «creâ un cuotidian cun varis protagoniscj dal mont economic furlan» si disvilupe intal centri di Udin, in vie Zanon numar 16 par jessi precîs, li dal studi dal avocat Eugenio Linussa. Paris dal «Messaggero» a son i conts d’Attimis Maniago, de Puppi, di Prampero, Orgnani, Kechler, Cavarzerani di Nevea, l’avocat Feliciano Nimis, i rapresentants de famee Manin di Passarian.

Il prin numar al jes ai 24 di Mai dal 1946. Al ven 4 liris. Al è fat di dôs pagjinis, cressudis a cuatri cui 23 di Març dal 1947. Il «Messaggero Veneto», cuotidian de buinore, si inlidrise in Friûl, al è distribuît fin a Gurize, in chê che in chei agns si clamave Zone A, metude sot dal Guvier Militâr Aleât. Cemût che al rimarche il sottitul, il «Quotidiano delle Tre Venezie» al smire a jessi un imprest di informazion no dome pe aree furlane, fin a tocjâ il Venit Orientâl.

Lu dirêç Enrico Mascilli Migliorini, za cjâf redatôr dal gjornâl clandestin «Veneto liberale».

TAL SEGN DI VIE CARDUCCI, LÀ CHE E NAS LA INFORMAZION

1947-1967

Tal 1946 la editore dal «Messaggero» e cuiste il palaç al numar 7 di vie Carducci, vecje sede de rotative dal gjornâl fassist «Il Popolo del Friuli». I machinaris presints ju dopre ancje il Comitât di Liberazion nazionâl pe stampe dal so gjornâl, «La libertà», fin che al sierà intal 1947.

Lis redazions dal «Messaggero» si inlidrisin tal teritori: Udin, Pordenon, Gurize, Triest e (dai agns Otante) ancje Monfalcon. A esistin trê edizions locâls.

Enrico Mascilli Migliorini al lasse la direzion tal Dicembar dal 1947 e si trasferìs a Napoli te redazion di «L’Opinione», gjornâl direzût di Benedetto Croce. Carlo Tigoli, za responsabil de redazion dal «Messaggero» di Triest, al ven nomenât so sucessôr, puest che al varà fin tal moment de so muart improvise, ai 21 di Març dal 1965.

Dopo di lui, al ven nomenât un diretôr incargât, la sielte e cole sul cjâf redatôr Isi Benini. E je une soluzion transitorie, che e dure dai 23 di Març ai 31 di Dicembar dal 1965. Il prin di Zenâr dal an seguitîf al cjape il temon Vittorino Meloni: al vuidarà il «Messaggero» par adiriture vincjesiet agns, fin ai 30 di Setembar dal 1992.

LA RIVOLUZION OFFSET E PARTÌS DAL FRIÛL

7 di Avrîl dal 1968

Ai 7 di Avrîl dal 1968 il president dal Consei Aldo Moro al scree il stabiliment dal «Messaggero Veneto» in viâl Palme al numar 290: al è lui che al frache il boton che al invie la rotative pe stampe dal numar zero dal gjornâl rinovât.

In chel moment il «Messaggero» al è il prin esempli in Italie di implant tipografic cun cicli offset pe stampe dai cuotidians. Al è ancje il prin in Europe a doprâ lis compositoris a pelicule magnetiche e cun memorie eletroniche IBM.

Cheste rivoluzion, cetant volude dal diretôr Vittorino Meloni, e segne il passaç definitîf dal “plomp” ae eletroniche, proietant il Friûl te avanvuardie de editorie internazionâl.

La sielte dal offset e garantìs une clarece di stampe e une velocitât di esecuzion mai viodudis prime, permetint al cuotidian di rispuindi in maniere pronte aes sfidis di une societât daûr a trasformâsi in maniere svelte. L’edifici di viâl Palme, progjetât dal architet udinês Gino Valle, al devente in cheste maniere un simbul di progrès industriâl e civîl, un laboratori tecnologjic là che l’avignî de informazion al cjape forme in timp reâl.

→ SALE N. 2

AL RIVE IL DIGJITÂL, DI LÀ DAL PLOMP E DE CJARTE

1978-1986

Te Sierade dal 1978, a dîs agns juscj de prime grande rivoluzion tecnologjiche, il secont salt indenant al pâr une evoluzion naturâl, cuasi un passaç obleât comandât dai timps. Se il 1968 al veve segnat il lâ amont definitîf dal ûs dal plomp, il 1978 al scree l’atac decisîf a chel de cjarte.

La rivade dai prins videoterminâi in redazion e in tipografie al puarte a adotâ un imprest gnûf e al scree une metamorfosi decisive te maniere di concepî il lavôr di ogni dì.

Sot de vuide previdente di Vittorino Meloni, il gjornâl si invie suntun troi di modernizazion che al domande di cambiâ in maniere radicâl la mentalitât di gjornaliscj e poligrafics.

No si trate di une corse sterile par vê il primât tecnologjic, cemût che al marcave il gjornalist Gianpaolo Carbonetto, ma une «ricercje di risultâts miôrs, sedi inte cualitât dal prodot che intal otimizâ i timps e il rapuart fra coscj e rigjâfs». Cheste eficience e devente la linfe par frontâ lis sfidis di un marcjât de informazion simpri plui dinamic e competitîf.

Dut câs, la rivoluzion dal 1978 no je la fin di un percors, ma il motôr di un progrès costant. Il «Messaggero» al va indenant a invistî tes inovazions: a rivin gnûfs cerviei eletronics, machinaris «impagjinadôrs» digjitâi, une rotative indenant cui timps e il scanner, un machinari une vore sofisticât par chei timps, bon di automatizâ la selezion cromatiche des fotografiis cun timps une vore curts.

Chescj cambiaments tecnologjics a trasformin il gjornâl intun model di ecelence in Italie, stiçant la atenzion dai rapresentants plui alts dal Stât.

CU LA DIREZION DI SERGIO GERVASUTTI, LA INFORMAZION SI FÂS RÊT

1992-1999

Il prin di Otubar dal 1992, cu la direzione dal furlan Sergio Gervasutti pal «Messaggero Veneto» e scomence une gnove stagjon. Sot de sô vuide, il gjornâl al invie un grant cambiament struturâl, indreçât a intercetâ lis trasformazions une vore sveltis di un public simpri plui esigjent. Intal 1993 e debute la formule dal fassicul dopli: une sielte editoriâl coragjose che e spartìs il grant agâr de croniche taliane e internazionâl di un cuarp dedicât dome ae dimension locâl, cun trê edizions diferentis par Udin, Pordenon e Gurize.

A cambiin la forme e ancje la architeture de notizie: la pagjine e passe des storichis nûf aes plui modernis vot colonis, cuntun progjet plui ariôs e biel di lei. La vere rivoluzion, dut câs, e je inte redazion.

Graciis ae inovazion digjitâl, il lavôr tal scritori al cambie in maniere radicâl: pe prime volte, il gjornalist al lavore cu la pagjine in vision direte, digjitant titui e didascaliis in timp reâl e acedint in maniere telematiche a un archivi integrât di tescj e imagjins. Cun chest passaç, la mediazion tecniche e sparìs e si definìs la figure dal “redatôr totâl”, bon di guviernâ dut il cicli produtîf.

Il deceni si siere cuntune svolte industriâl che e proiete il cuotidian intune dimension taliane. Intal 1998, l’inzegnîr Carlo Melzi al cêt lis sôs cuotis al Grup Editoriâl L’Espresso. Il «Messaggero Veneto», duncje, al jentre tal network Finegil, zontantsi a une galassie prestigjose di disevot gjornâi locâi.

Cheste integrazion e garantìs al gjornâl une soliditât struturâl inedite, permetint di conservâ la sô anime furlane, ma zovantsi des sinergjiis e des risorsis di un dai sogjets editoriâi plui impuartants in Europe.

LA GNOVE MUSE DAL «MESSAGGERO»

2000-2014

Il gnûf mileni si vierç segnât dal cambiament: ai 12 di Avrîl dal 2000 la gnove proprietât e sielç Sergio Baraldi pe direzion dal gjornâl, che al vuide fin al passaç di testemoni al so vice, Andrea Filippi. Sot de regjie di Filippi, il cuotidian al fronte une sfide epocâl par rispuindi aes gnovis abitudins di leture: ai 22 di Març dal 2011 il «Messaggero Veneto» al debute tal formât tabloid.

Ridusi lis dimensions si compagne cuntun grant mudament: il gjornâl al devente full color, il numar des pagjinis al cres in maniere sensibile (fin a otante pagjinis pe edizion de domenie) e la grafiche, za rinovade intal 2010, si fâs dinamiche e moderne. Chest salt tecnologjic al devente pussibil cu la scree di une rotative gnove e futuristiche intal stabiliment di 3.500 metris cuadrâts a Sant Andrât di Gurize.

Intant il gjornâl al acelere ancje sul digjitâl. Se lis primis sperimentazions online a rimontin ae fin dai agns Novante, intal 2009 e rive la vere svolte, vierzint un portâl web gnûf e evolût. La plateforme, che sul imprin si inzornave a ritmi setemanâl, e devente un apontament cuotidian essenziâl dal Lui dal 2011 indenant.

Rivât Omar Monestier ae direzion ai 13 di Març dal 2012, il sburt bande la dimension social e multimediâl al savolte dut. Cheste vision strategjiche e van indenant con Tommaso Cerno, e il «Messaggero» si trasforme intune vere marche cross-mediâl: un ecosisteme informatîf là che lis gnovis a corin cence padin jenfri la cjarte e la rêt.

Al è un percors di ecelence editoriâl e di evoluzion tecnologjiche che al cjate stabilitât e un sburt gnûf cuant che Monestier al torne al temon dal cuotidian cul 1n di Dicembar dal 2014, sapontant il leam fra la tradizion furlane e la inovazion globâl.

LA RIVOLUZION BLU DI «NOI MV»

2017

Tal Jugn dal 2017 il «Messaggero Veneto» al scree une des campagnis di comunicazion plui coragjosis e identitariis de sô storie resinte. Une figure sureâl e riclame la atenzion tal mieç de sene, alc bon di rompi i schemis visîfs tradizionâi: une gjaline blu daûr a fâ trê ûfs. E je la muse di «Noi Mv», la plateforme nassude par trasformâ il letôr di spetatôr passîf intun protagonist atîf, produtôr di storiis, segnalazions e contignûts. Doprâ chest nemâl simbolic al zuie suntune stratificazion di significâts une vore fine. Prin, la ecezionalitât: il colôr blu al trasfigure l’ordenari in straordenari. Al comuniche che «Noi Mv» no je dome une rubriche, ma un progjet lontan des vecjis normis editoriâls, une inovazion “fûr de cuote” pal panorame locâl. Secont, lis lidrîs e la concretece: la gjaline, regjine dai bearçs furlans, e incjarne la tradizion rurâl e la culture dal “fâ”.

Sielzile al vûl dî fevelâ la lenghe dal teritori cuntun lengaç grafic pop e moderni, restant fedêi a une identitât pragmatiche e sclete. Tierç, la gjenerositât: come la bestie, che e da cun costance, ancje il letôr fedêl al insiore ogni dì il gjornâl. In timps là che al parone l’ecès informatîf, i ûfs a rapresentin la purece de notizie che e nas dal bas: ogni fotografie o post condividût al è une semence di vite che fâs sflorî il gjornâl.

Il «Messaggero Veneto» al modernize la sô imagjin cence tradî lis lidrîs furlanis. Lei il gjornâl al devente un at di apartignince a une “famee lavoradore”, confermant che la risorse plui preziose di un cuotidian e reste, vuê plui di simpri, la sô comunitât. Cun chest progjet il «Messaggero Veneto» al devente il prin gjornâl di chel che al jere il Grup Editoriâl L’Espresso a sperimentâ un sît a paiament, metint a disposizion contignûts premium risiervâts ai abonâts, come newsletters dedicadis, longforms, videoinvestigazions e incuintris in redazion.

LA ETE DI NEM E L’AVIGNÎ MULTIMEDIÂL

2023-vuê

Il 2023 al à segnât un cambiament struturâl pal «Messaggero Veneto» cu la sô acuisizion di bande di NEM - Nord Est Multimedia.

Chest passaç societari al à inserît il gjornâl intun gnûf grup editoriâl integrât, che al vûl valorizâ lis vôs storichis dal teritori cun invistiments tecnologjics e sinergjiis multimediâls.

Sot de direzion di Luca Ubaldeschi, e po dopo di Paolo Possamai cul codiretôr Paolo Mosanghini, il cuotidian si è evolût in maniere sigure tai siei formâts e lengaçs. Indotâsi di un model redazionâl “digital first” al à permetût di implementâ la ufierte informative in timp reâl, metint dongje al formât classic di cjarte imprescj gnûfs tant che newsletters tematichis, podcasts e une presince strategjiche sui social networks. L’ultin restyling grafic de version di cjarte e dal sît web e rispuint aes dibisugnis di une leture plui clare e facile su ducj i supuarts. A otante agns de sô fondazion, il «Messaggero Veneto» si presente vuê come un centri informatîf bon di meti dongje la autorevolece dal gjornalisim di investigazion cun vôs competentis che a puedin judâ i letôrs a decifrâ lis complessitâts dal presint. Dut chest in graciis des potenzialitâts de distribuzion digjitâl globâl.

PRIN PLAN

→ SALON NOBIL

IDENTITÂT IN PRIME PAGJINE

Un percors dentri de croniche che, midiant di cualchi prime pagjine emblematiche, al invide a un confront diret cu la memorie coletive, celebrant il gjornâl come une bussule di une comunitât che e cjamine indenant.

L’itinerari al tache cui 24 di Mai dal 1946, la nassite dal cuotidian intun dopovuere dificil, e al conte i moments plui impuartants dal secul passât: Triest che al torne ae Italie (1954), il bon acet pai Alpins a Udin (1974 e 2023: a son dôs des cuatri adunadis inmaneadis inte citât, dongje di chês dal 1983 e dal 1996) e la storiche partecipazion dal Udin inte Champions League (2005). Lis pagjinis a pandin la evoluzion di une tiere di confin deventade il centri de Europe: dal invît ae pâs dal 1992 al ricognossiment dal “miracul Friûl” di bande dal president Carlo Azeglio Ciampi (2002), fin al moment storic de colade dai confins intal 2007.

La conte po e devente croniche dal presint e memorie intime: la nassite de comunitât «Noi Messaggero Veneto» (2017), il dolôr de pandemie (2020) e il salût ingropât al diretôr Omar Monestier (2022), vuide autorevule e apassionade dal gjornâl.

Il viaç al va indenant cu la rielezion dal president Sergio Mattarella (2022) e lis impresis olimpichis di Parîs 2024 e Milan Cortine 2026, fin a events teribii come la tragjedie dal Nadison (2024).

Cu la jentrade tal Gruppo Nord Est Multimedia (2023), il «Messaggero Veneto» si salde tant che cûr pulsant e tecnologjic di dut un teritori.

→ STANZIE N. 1

VITTORINO MELONI: L’ARCHITET DAL AVIGNÎ

Par vincjesiet agns, dal 1966 indenant, Vittorino Meloni al è stât al temon dal «Messaggero Veneto» cuntune capacitât di strolegâ fûr dal comun. Fotografiis di archivi a mostrin la figure e il voli rigorôs di Meloni, invezit i siei editoriâi plui incisîfs si disglagnin come mûrs di test, olmis di un pinsîr che al à savût dâ vôs e forme ae identitât furlane intal secont Nûfcent.

Meloni al è stât un pionîr dal cambiament, il so puartâsi indenant su la modernitât al à fat in maniere che il gjornâl al taiàs travuarts tecnologjics che in chei agns a vignivin calcolâts impussibii. Dai prins esperiments di fotocomposizion fin ae digjitalizazion, il Diretôr al intuì in maniere profonde che la inovazion no fos un fin, ma l’unic mieç par servî cun dignitât une comunitât daûr a cressi in maniere svelte e braurose.

Al interpretà il gjornâl tant che un organisim vîf, bon di evolvisi insiemi al so popul: la sô e je stade la direzion di un reporter militant e tal stes timp visionari, bon di scoltâ il teritori e di cjalâ di là dai confins nazionâi. Meloni al trasformà la redazion intun laboratori ae avanvuardie, dulà che la precision dal cronist si cjatave cu la olse dal imprenditôr iluminât.

Nus à lassât une lezion di metodi, une leadership coragjose che e à fat dal gjornâl une ecelence tecniche e culturâl.

→ STANZIE N. 2

IL FUTÛR IN PRIME PAGJINE

LA OFICINE DAL “MESSAGGERO SCUOLA”

Il Messaggero Scuola, une vere «redazion dal doman», dal 1999 incà e rapresente un dai progjets plui luncs e vivarôs dal «Messaggero Veneto». Nassût tant che laboratori di citadinance, il progjet al trasforme ogni setemane il cuotidian intune palestre di democrazie: par dut l’an scolastic, une redazion fate dome di students e firme cuatri pagjinis di insert. E je une conte «fate dai fantats pai fantats», un puint gjenerazionâl che al à savût evolvisi tal timp, e che vuê si à inlidrisât a fuart intes scuelis secondariis di secont grât graciis a colaborazions positivis cu la Fondazion Friûl a Udin e cu la Cjase dal Student Antonio Zanussi a Pordenon.

L’obietîf de iniziative nol è formâ i gjornaliscj di doman, ma furnî ai zovins un orientament critic par movisi inte complessitât dal reâl. Midiant de esperience direte in redazion, tra scjadincis e ricercje des fonts, i students a jentrin in contat cu lis rêts istituzionâls e culturâls dal teritori, trasformant la croniche di semplice notizie a mieç di comprension dai fats e dal mont.

Par chest, partecipâ al percors al vûl dî meti adun un bagai di competencis civichis e relazionâls che a superin l’aprendiment tecnic gjornalistic: al è un patrimoni di cussience che i fantats a puartaran cun se ancje di là dai “bancs” di redazion, pronts a vivi la societât tant che citadins atîfs, informâts e parons di un pinsîr autonom.

Il «Messaggero Veneto» si cjape la responsabilitât di coltâ la cussience civîl de sô comunitât, scometint sul talent e su lis risorsis des gnovis gjenerazions.

→ STANZIE N. 3

LA RINASSITE DAL FRIÛL FRA POLVAR E CÎL

Te atmosfere di une sale neoclassiche, la memorie dal 1976 si trasforme in materie aerie e vibrante.

Une metafore visive potente e definìs il spazi: tai mûrs, tiessûts impalpabii a pandin il blanc e neri dal archivi dal «Messaggero Veneto». Su chestis tramis svoladis, lis fotografiis des rudinis e il berli de tiere a vongolin tant che un vêl su la storie, trasformant il cidinôr dai rudinaçs intune esperience imersive e sospindude.

In chest perimetri di sclesis e memoriis, il drame al mude segn a pene che il voli si môf tal mieç de sale. Achì, des maseriis evocadis sui têi, a vegnin fûr lis sacumis a colôrs di cui che al è sorevivût: figuris che si distachin dal mûr dal ricuart par deventâ presince reâl. No son ombris di dolôr, ma profîi vîfs che a incjarnin «une grande voie di vivi», simbul di une comunitât che no si è lassade sepulî. E je cuasi une conte plastiche dal “model Friûl”, un paradigme là che la ricostruzion no je stade dome une architeture di pieris, ma ancje un tornâ a fondâ il spirt. Il «Messaggero» al dimostre che la informazion e pues deventâ cole etiche e imprest di coesion sociâl intal moment de dibisugne.